La Toureto, ruà de la cumuno de Chasteldeifin, prepaouzo per lou prumier journ dei 2000 la vieio tradisioun dei Fantome, que raprezento l'ann que fenis. La "festo" encoumensarè lou 31 de dezembre, a 3 oures de l'apres mesjourn, conte per les quintanes de la Toureto s'oouvarè a criar: "Pàio! Pàio!" e i jouve pasaren da les meizoun encà dubertes, ou mai dubertes per l'oucazioun, a cuìr la paio de seil per far lou Fantome. Mai de pàio i lei aribaren a cuìr, mai lou Fantome sarè gros. La nuech se pasarè en part a gardar lou Fantome, que pei venarè sdreisà dedin en post segur, e en part a balar e a far festo.

Lou journ dei prumier de l'ann, vers la fin de la matinà, lou Fantome venarè pourtà dins la piaseto dron de la fouont, e aquì al restarè finde a 3 oures de l'apres mesjourn. A 'n aquel'ouro la encoumensarè la part pu empourtonto de la festo, abou lou prouces ei Fantome e la procesioun per les vies de la ruà coumo se la fous 'n enterament , seguì da la muzico e i tambourin. A la fin lou Fantome venarè pourtà dins en prà e brusà. Tuchi asistoun quiet finde que lo chichou de paio es tout bruzà. Mac la meinà i couroun d'entourn en criont tuchi i bot que n'en chei en toc.

Apres, la festo countinuo abou lou vin brulè e les donses de la valado.

Chasque bot les senténes de persounes que partesipoun a 'n aquelo vieio manifestasioun sentoun dins aquiè gest n'artage que ven da luenh e que degun sa papus enterpretar.

OUSITANIO VIVO - Anado XXV - n° 11 - dezembre 1999 - N° 240