OUSITANIO VIVO Settembre 1997
Valades ousitanes premiat als Festenals dal documentari
un'edicioun especiala dal film en vendita abò La Stampa
Après las bònas remarcas de los jornals e de la critica, las
proiecions dins los pais de las valadas e las vilas de la piana e lo bon
parlar que s'es fach dins la pi part dels endreches, "Valades Ousitanes",
film-documentari de Diego Anghilante e Fredo Valla, bastit per Occitania
Viva, vien de ganhar de premits als festenals.
Coma aquò lo film es estat senhalat à lo "11° Festival
internazionale del film turistico" de Varese: premit special de
la juria. Lo film-documentari a puèi reportat lo premìer
premit - secion etnografica - à la "4° Rassegna del
documentario italiano" debanàa à la fin de julhet à
San Benedetto del Tronto (Marche).
De segur aquest es lo principal festenal dedicat als documentaris en Italia,
e la motivacion dal premit, donat d'una juria ente feguraven lo regista
Mariò Brenta, Giangi Pòli regista de Quark, los critiques
Italò Mòscati e Luigi Di Gianni dal Centre Esperimental de
Chinematografia, a remarcat lo còr, la competença e la qualitat
artistìca que los autors an betat dins lor travalh.
Tot aquò fai en bon renomat qua vai à se jonher à la
gròssa iniciativa menàa per tot lo mes d'avost e setembre
da lo jornal La Stampa de Turin abò l'associacion Occitania Viva
e Zabun Uno, de Coni, qu'agut la bòna idea e tengut tuchis los contactes.
Ensemp an aprestat una nòva videòcaissetta dal film reducha
à 47 menutas contra las 98 menutas de la vercion integrala. Titol
"Valli Occitane -viaggio tra gli eredi dei trovatori" en italian.
Aquesta nòva edicion dal film-documentari es estàa betàa
en vendita a 14.400 liras abò lo quotidian La Stampa dals jornalìers
de las valadas e dequò de las vilas de la piana, à Coni, Mondovì,
Pinherol e Salusse.
La Stampa dona ensemp à la videòcaisetta "Valli Occitane"
en libret de 10 paginas - 21x30 - qu'esplica çò qu'es l'Occitania
(teritòri, nòm, gent e lenga) garnit de fotografias vielhas
e nòvas de la Baìa de San Peyre. L'operacion es estàa
promocionàa abò força des paginas entieras e mesas
paginas de publicitat e articols redacionals pereissuts se La Stampa edicion
provinciala e tamben rejonala. 'Bo aquò la premiera tirada de la
caisetta es anàa feniàa dins pas gaire, e despuèi es
ja estàa restampàa.