OUSITANIO VIVO mars 1999
Bessonatge Collège Val Maira - Collège Leon Còrdas de Montpelher
Dins lo 1998 li escolar de l'escòla media
d'Estròp avíon entamenat un bessonatge abó lo Leon Còrdas en
fasent una visita de quatre jorns ent'aquò lor a Montpelhier.
Aquest'an avem recebut lo contra-chambi e parelh lo 9-10-11 de
març li avem agut en Val Maira. Eron en quinze, acompanhats da
la professora de italian Natalia e dui animators.
Per qui conois ren lo collègi Leon Còrdas val la pena
d'espender doas paròlas. Naissut l'an passat coma premiera
escòla media en tota l'Occitania que cuntunha lo chamin de las
Calandretas (las escòlas mairalas e primarias -elementaras
plurilengas abó l'occitan coma lenga principala), fins aüra a
agut un gran succes: l'an passat 17 escolars, aquest'an 34, per
l'an que ven son previst mai de 60. L'entencion es de far salhir
d'aquelas escòlas medias en tota l'Occitania coma es capitat per
las Calandretas.
L'idea de bessonar nòstra escòla de la Val Maira, ent'i a
encara d'escolar que devison la lenga nòstra coma lenga mairala,
e aquel collègi ont l'occitan s'empara a l'escòla, es semelhaa
formidabla e parelh la Comunitat montana Val Maira a fach e
financiat li progets de realizacion: “Occitan lenga
viva” e “Paratge”.
Una jornada sus la neu en auta valada abó la vísita a lo Museu
“La meison d'un bòt” de Charveta, un'autra a veire Li
Chicho dal Vilar, lo chastèl de Manta, la vila de Saluce e
l'Abadia de Stafarda. La matinaa dal jòus activitat didatica
ensemp a li escolar d'Estròp (per aüra encara provisòri a
Acelh) e, dins l'apres mesjorn, gran fèsta al Convit.
S'es passat tot en maniera formidabla (socializacion, amicicia,
alegria) mas doas paròlas de mai chal las dir sus la fèsta dal
derrier jorn. Tres esquadras (còlas, coma dison lor ilai)
boidraas Val Maira-Montpelhier, se son batùas dins un juec
“a quiz” en tres lengas: occitan, italian, frances.
L'animacion e la partecipacion son montaas e li estelas e tuchi
an salhit las lor coneissenças de lenga, de cultura generala,
d'actualitat e d'espòrt. A tuchi de premis, una bòna lescha de
colomba de Pasqua, un bòn goblet (de ròba dòuça) e danças,
nòstras e lor, fins a lo sera. Un salut abó les grimas a li
uelhs e a se reveire l'an que ven.
Dario Anghilante