OUSITANIO VIVO Maggio 1997
ESPACI OCCITAN
Descricion del projècte
Lo projècte ESPACI OCCITAN es prepausat per la Comunitat de Valada de la Val Maira, mas veirà la partecipacion de totas las autras comunitats de las valadas occitanas. En particular, per la Provincia de Coni:
L'ESPACI OCCITAN aurà son sèti a Dronìer, dins la casèrna vièlha pels soldats de montanha "Aldo Beltricco". Aqueste lòc foguèt causit per sa posicion centrala en respècte a totas las valadas, e tamben per la facilitat de ligams amb las vilas, las universitats e l'estacion ferroviària de Coni.
Lo projècte a coma tòca la creacion d'un Istitut d'Estudis
Occitans e d'un Musèu Sonor de la Lenga Occitana: "S_N
DE LENGA", per botar las valadas al meteis nivèl cultural
que Catalonha, Val d'Aran e Occitania granda, per la promocion lenguistica
e culturala. I aurà parier un emportant sèti per la producion
culturala e per la visibilitat d'aquela cultura amb lo musèu sonor
coma premier estrument d'ensenhament e coma veirina.
L'ISTITUT devarà dirigir tot lo trabalh de l'Espaci e serà un "centre de servici lenguistic" per totas las valadas, per portar una cultura sovent d'eleit al contacte de totes, e per ligar la cultura a l'educacion, la formacion e l'economia.
A la debuta, serà mai que mai un centre de documentacion per la collecion de libres, musicas, revistas, videòs... e un biais per estabilir de contactes amb las istitucions que dins tot lo monde estudian e trabalhan sus la cultura occitana (dins las Valadas, a Turin, a Montpelhier, a Tolosa e autres centres d'Occitania, dal Japon a l'Alemanha ...).
Après aqueste primier servici, l'Istitut començarà d'autres projèctes de granda emportancia per las valadas, mai que mai lo trabalh sus la lenga, l'economia e la finança.
Un'autra tòca de l'Istitut serà l'organisacion de concèrt,
convenhes, projeccions, debats e seradas publicas dins lo meteis Istitut.
Lo Musèu S_N DE LENGA mostrarà a d'autres que los apassionats, las tradicions, l'estòria, la literatura, la cultura, lo biais de viure (qu'èra un còp e d'avura) de las valadas. Una atencion particulara serà botada a la partecipacion dels mainatges.
Dins la casèrna i aurà tanben d'espaci per un OSTAL
DEL TORISME VALADAS OCCITANAS, per la promocion d'itineraris culturals
e tutistics sus la tèrra de frontiera de la Region Piemont, Region
Provença e Region Ròse-Alps amb la possibilitat de reservar
restaurants e albèrgas, destribucion de depliants, organisacion de
viatge e vesitas ...; per una CHAMBRA D' OC, una veirina que prepausarà
e vendrà directament los produches de qualitat del territòri
(agricultura, artisanat, editoria ...) amb una particulara "marca".
Es tanben prevista una Gran Traversada de las Valadas Occitanas que, sus las dralhas marcadas "G.T.A.", traversarà totas las valadas per finir a Dronìer, a l'ocasion de la dobertura de l'ESPACI OCCITAN.
Dal projècte de l'E.C.E.S. (European Center of Environmental Studies), presentat a la conferéncia del 18/04/1997 dins la sala "Viglione" del Consèlh de la Region Piemont, revirat en occitan per Mauro Bertolino e Mathias Van Den Bossche.