OUSITANIO VIVO Aprile 1997

Lo PNO a Nissa la Bella

Aquest an per Pasques, lo Comitat Nacional dal Partit nacionalista occitan s'es baronat sus la colina de Cimiès a Nissa.
Vengües sobretot dal Pais nissart e de la Provença mas dequò da Lemòges, Agen e Nantes, da la Catalonha e da les Valades, vint persones an seguit la reünion.
Après les salutacions, quarqun a rementat que trenta-uech ans fa, lo Partit era estat creat a Nissa da François Fontan dins lo negòci de discs de Ben. S'es dequò fach notar que lo primier Congres sionista de Basilea s'era dubert precisament cent ans fa, lo 29 de març 1897.
Per començar, se son afrontats li problemis dal "Lugarn" qu'a melhorat lo contengut e la scadença de parucion mas qu'aruba ren a sorte de la confidencialitat e a eslarjar lo numre dei abonats.
Puei, lo president dal PNO, J.Ressaire a lançat lo dibàtit sus l'argument pus emportant de la reünion, la poaa dal Front nacional en Occitània mediterranea. Après aver afirmat la sioa paur davant aquel enreiçament d'una mentalitat e d'una politica fascista ent al nòste, al a propausat de contratacar en formant de legues regionales autonomistes.
Tuchi son estats concòrdis per dire que la mancança d'un ver esperit nacional occitan noiris lo sciòvinisme e lo racisme blu-blanc-roge en Provença e Lengadòc. Truchaa da tanti cambiaments dins la soa vita, la nòsta popolacion a da manca de se restachar a 'n'identitat que ie semelha segura. En sieguent les peaas dal breton Le Pen, vai a contra pe de la stòria.
Un jove d'Ais de Provença a propongut de donar a la gent 'n'alternativa nòsta fondaa sus la vita, la solidaritat e la prosperitat provençales contra lo centralisme e lo fascisme francès.
Vist qu'a Nissa e a Luceram, un autre païs de la zòna, ei occitanistas son mentre que cercan d'estalar dui "Ostaus de païs", s'es parlat d'aqueles iniciatives econòmiques que vòlon esser de veirines per les produccions locales.
Lo sande sera, ei presents an agut lo plhaser de veire lo film "Valades Ousitanes" que tuchi an apreçat bela se la lenga italiana es da mal capir per quarqun que la conois ren. S'aspeta abo enteres 'na version en francès.
Naturalament, s'es parlat de les prospectives que la ie a dins les Valades. Lu project "l'Espaci Occitan" de Dròunier a enteressat lo monde present.
La situacion de nòstes Valades se pol ren separar d'aquela de l'estat italian. S'es de conseguença afrontat la question de la Lega e dal federalisme.
Se polian ren desmentiar ei problemas internacionals. De la Catalonhe, s'es parlat abo un rapresentant de la Convergènçia Democratica -CDC- que a fach present que l'enterès dei nacionalistes catalans per les minorances ven de 'na vision etnista de la unitat europea.
La discussion s'es dequò fermaa sus la Galiça qu'afirma de mai en mai son caractre portuguès e s'es notat la difidença de l'assemblea vers ei pseudò-nacionalismes de les varies regions espanhòles fòra de Catalonha, Galiça, Euzkadi e la Val d'Aran.
Ei terribils problemis de l'Africa dal Nòrd e de la Berberia son estats tractats e lo PNO a ribadit lo sio sostenh a les fòrces berberistes e democratiques.
S'es concludut la reünion sobre la necessitat d'anar avant pas mac en criticant ei poters parisencs o italians, pas mac en afrontat les fòrces politiques colonialistes mas dequò en fasent naisser d'iniciatives concretes sensa aver paur de se liar abo qui ten ei sòuts. Fòra de l'occitanisme, de gent nòva, occitana o pas, es aquì pronta a nos jutar. Donèm ie la man.

Jean Louis Veyrac