OUSITANIO VIVO mars 1999
L’on que ven fazaren la Beò dei 2000
Entervisto a Richard Matteo, de Blins
Coumo avion anunsià sus Ousitanio Vivo de dezembre, a Blins, en aouto Val Varacho, lu 14 e lou 16 de febrier s’es tournà a far Beò (Baìo) apres 40 ann de enterusioun. L’ei està n’aveniment empourtont, en senhal que marco, coumo tonti aoutre que nous ariboun da les valades, na tendenso a na novo counsiderasioun e en noou respet vers les tradisioun e vers la nouostro coulturo en general. Dins aquie dui jour de soulei les court e les quintanes d’ei Cartier N’aout de Blins, bloou coumo ‘l ero jomes aribà, se soun empì de mai de 1500 persounes vengues a salutar la Beò, que degun pus couneisiò. Soun mountà a Blins d’estudious, de reserchaire de l’università, per lou prumier on fach lour aparisioun a la Beò de " cineouperatour " e de televisioun.
La Beò de Blins es dei meme temp en carlevar e na manifestasioun estorico que ven da luenh. Carque reserchaire voulariò veire soun ourigìno dentourn ei Xme siecle, conte de scàdres de bandì que venion da l’Asio, atravers l’Espanho e la Fronso, venion asacajar viles e mounastere de la pianuro e i se pousavoun finde a la testo de les valades per roubar e destruire, en leisont la poupoulasiun terourizà. Poupoulasioun que a la fin se sariò revoultà en fazont na sorto d’esercit e avariò mandà viò aquelo gentaio. Per navizar aqueie aveniment se sariò pres la coustumo de far na festo, que segurament dins i siecle oourè ben chambià, ma tetun carcaren es aribà finde ai nouostre jour.
Aven entervistà Matioou Bataio, Matteo Richard, ex sendic de Blins, emigrà abou sa famiho a Piasco, dins la baso Varacho, que abou na forto determinasioun a fach renaise la Beò.
Vos nous countar cales soun estas les pu groses dificoultas dedin l'ourganizasioun de la Beò?
L’aviò tonti ann que s’ero papus fach Beò e chariò far intrar dedin la testo dei mounde que l’ero pousibou tournar a la far, perquè, apres tonti ann la gent la creiò mouorto per sempre. Ai piantà lou quiò... a me sui dich - chal que aribe a me prene aquelo soudisfasioun persounalo, ma sourtout far veire ai jouve que l’avion pa jomes visto, que 'l ero na jolio cozo da pourtar avonti e da reproupoune per l'avenir.
De aqueli que on fach la Beò, caicun sabiò ou se navizavo de caicaren?
De i 32 persounage de la Beò d’aquest’on (en bot i eroun na cranteno n.d.r.) mac na persouno aviò jò fach la "sarazino" dins la Beò dei 1958, tuchi i aoutre avion pa jomes vist ou se navizavoun papus. Bounur que, dins i ann ’70, Matilde Deferre na fiho de Blins, aviò fach sa " tesi di laurea " sus la Beò, boucò en paou en prenont da aquelo doucumentasioun e en paou en demandont a i viei que l'avion facho, en betont tout ensemou, soque diziò un e l'aoutre sen aribà a far reviooure l’esprit de chascun persounage.
Caie soun, secount tu, i persounage pi carateristic e pi empourtont de la Beò?
Retenou que i persounage soun tuchi empourtont, ma lou viei, la vieio, lou turc e decò lou gendarme soun i persounage prensipal; soun aquìe que se i ariboun a intrar ben din lour part, doùnoun lou ghéddou a la Beò.
Tuchi on fach mai que lour pousibou per aquesto Beò.
La Beò es jolio per sa grondo teatralità : lou tai de la bariero, l'enterougatori dei viei embè lou persounage de la ruà que à stoupà la viò oube n’àrbou, lou medic,’l ei tout emprouvizà sei moument, din aqueles part la vai de ver atour.
S'es en baroun parlà de la vostro decisioun de far intrar es fremes din li persounage de la Beò; penses pa que 'din aquelo fasoun se perdarè pa lou sens de la tradisioun que vai ben luenh, fin a lou Mediouevo? Penses pa que de omes vestis da fremes on na valenso diferento?
Per carcun aquelo desisioun es està na maganho d’aquesto Beò ; ma aquì se tratavo de far ou de pa far la Beò. Vist que i ome despounible eroun pa sufizent e tonti on pa pourgù partesipar per de razoun de familho, la souleto soulusioun 'l ero de far intrar les fremes. Que on fach la part ‘d es fremes, mac la vieio es està facho da 'n ome. Tuchi i persounage de la Beò, per tradisioun, devoun esser dei Cartier 'N Aout (Prafauchier,Seles e Chazal) s’oouguesoun agù prou de jent oourion fach Beò embè tout de ome. L’ei ver que la Beò s’es sempre facho mac embè d'ome e embè en certou esprit,nouzàoutre aven cerchà de la reproupoune dins na fasoun lou mai pousibou vezino a ‘n aquel esprit, ma i temp soun chombià e se fai papus de diferenso tra ome e fremo.
Tetun retenou que la Beò pol papus eser na festo mac per lou mounde dei post, ma na festo pubblico, bele se a la partenso pensavoun de la far mac per nouzaoutre.
La Beò d’aquest’ann es està facho escazi touto da persounes que soun emigras. Coumo te espiegues a cò?
La gron part de la gent que isto encaro eisì es fourmà da de persoùnes ansianes, ou da de jouve que on pa vueio de far festo din aquelo maniero. Tuchi soun està envità a les reunioun de preparasioun, carcun a creigù dabort que la Beò pouiò renaiser, d’aoutre on pa partesipà perquè i ou creion papus pousibou. Après, tonti se soun recreigù e partesiparen 'n aoute bot.
En viage la Beò, coumo es festes de tuchi li noste pais se faziò per devierte lou mounde de isì! e se pasavo da un estabi a l'aoutre ... eiro embè les nostres ruà vuides l'empresioun es que nostes festes se fazoun pusc per li touristo, caicaren que se fai per li aoutre e papus per nouzaoutres. Tu as pa aquesto poour?
La Beò en bot ero facho mac per la gent d’ei post e aquesto 'l ero decò la nouostro ideo, ma apres, abou lou tapage que i nous on fach d’entourn i journal e la televisioun carcaren nous à scapà, tetun l’ei està na publicità per Blins.
La Beò es està facho sourtout per aquìe que on partesipà, ma apres 40 ann que se faziò papus l'enteres ero gros e a tirà en baroun de mounde, de apasiounà de mountanho, de studious. Da soque ai pourgù veire m’es semeà de gent respetuzo.A esperou que aquesto publicità chombie pa lou rezoultà de la manifestasioun e faze pa de la Beò na bruto manifestasioun foulclouristico coumo tontes que es pa lou cas de citar.
La Beò a decò vourgù dire far festo e balar mezo la nuech a Les Seles en pien uvern, da tonti ann la capitavo papus. Penses que l'esperienso de la Beò pouiarè chambiar caicaren 'din la dinamico de Blins, per esempi pouiarè rapresentar en punch de partenso?
La Beò en pien uvern, dedin na peio mouorto per la mountanho a pourtà de vito e de mouviment din lou pais, l'oste s'es dubert espres per la Beò e es decò està n' oucazioun per se retroubar e far festo.L’ei nouostro entensioun de refar la Beò n'aoutre ann, din lou 2000 per veire se chal melhourar carcaren e per dounar la pousibilità de la far a n’aquie que l’on pa facho, e apres de la repoupoune chasque tres ans, per tenir vioou l'entusiasme din i jouve e l'enteres din la gent. Tres ann, bele per lou gros travai que douno la Beò a ‘s fremes per preparar e couze i bindel.
A trobou pa scandalous de enserir din la manifestasioun les fremes, sourtout per respet vers lou travai que les fon.
En bot les "barboùires" , que da S.Ontoni a Carlevar viravoun les ruà, pasàvoun din les voòutes entè se veiavo : acò pouiaren papus ou far… perquè moncoun les véies.
Lena Gerthoux