OUSITANIO VIVO Marzo 1997

BATEAIES D'EN FILM
"Valades Ousitanes" prezentà a la Prouvincho de Couni lou 7 de mars

Lou 7 de mars, a Couni dins la novo salo d'es counferenses de la Prouvincho, se soun tengues les bateaies dei Film-doucumentari "Valades Ousitanes", abou na prouiesioun ourganizà da Ousitanio Vivo e da l'Aministrasioun prouvinchalo.

La presentasioun de Couni es venguò apres aquelo, facho lou mes pasà a Turin, dedicà ai journalisto e que a fruchà de servisi a la televizioun e en gros rezalt sus i journal loucal e nasiounal.

La caiseto abou lou film es en vendito a partir da la fin de janvier, en oucazioun de la Baio de Sampeyre, ente i a agù n'acoulhienso entuziastico abou na groso cantità de jent que l'a achatà.

Que aqueste Film sus l'Ousitanio visto da dedin oougues creà na fiereso etnico, n'aven agù counfermo a la serado de Couni:

la salo des counferenses de la Prouvincho, que counten mai de 300 persounes, ero bourà de jent, venguò apu-pres da toutes valades, (carcun, coumo lou sendic de Salbertrand, s'es fach sentenes de km.) a render ounour an aquest'obro empourtonto e a Diego e Fredo, i dui ousitanisto que l'on realizà. Chasque valado ero decò raprezentà da poulitic e aministratour, e naturalment eroun present i prinsipal espounent d'es asouchasioun coulturales ousitanes.

Dario Anghilante, president de Ousitanio Vivo, a prezentà la serado ensemo a l'asesour a la Provincho Marco Carpani. Dario a countà coumo es neisuò l'deo dei Film, coumo, grasie sourtout a la bravuro e a la competenso de Fredo e Diego, (ma decò ei finansiament de la Comunità Eouropeo, de la Regioun Piemount, de les Prouvinches de Turin e de Couni, de les Coumunità Mountanes, de la Bonco CRT , de la RAI Val d'Aousto, e de sponsor privà d'es valades) n'asouchasioun coumo Ousitanio Vivo a pougù realizar l'obro; al a countà a na plateo criouzo des atività de nouostro asouchasioun, dei journal Ousitanio Vivo que da mai de vint an es en riferiment per tuchi i ousitan, de l'esplouzioun d'enteres vers la muzico e les donses d'es valades, dei ferment noou que atraverso chasque valado dins i counfrount de la lengo e la coulturo ousitano, da l'enteres noou e jomes vist vers la nouostro coulturo demoustrà a livel de la Prouvincho e de la Regioun.

Marco Carpani, asesour a la Prouvincho, a fach remarcar coumo l'ezistenso de la minouronso ousitano siè pa 'ncà prou couneisuò, e que en Italio 'l à de gros persounaje de coulturo, coumo Sergio Zavoli que lou sero de dron ero dins aquelo salo per na counferenso, que on pa jomes oouvì a parlar de la minouronso ousitano.

A la fin de la prouiesioun, tuchi on picà les mon a Diego e Fredo, e la se sentiò que 'l ero pa mac en coumpliment de circoustonso.

Giovanni Antonio Richard