OUSITANIO VIVO Dezembre 1997

SERADO OUSITANO A BRUXELLES

Bele que la charamaies en touto l'Eouroupo dal Nord l'espedisioun ousitano, fousìo⁽¹⁾ sal fourgoun menà da Mirka Falco, es aribà touto entiero a Bruxelles.

A la serado dedin lou Parlament eouroupenc 'l avìo mai de 80 persounos, en public redi qualifià de journalisto e de eouroparlamentar catalan, franses, italian, gales e de aoutros minouransos. 'L ero decò prezent l'eouroparlamentar aoustriac Otto von Augsburg, erede de la mizoun emperialo d'Aoustrio.

La "Serado Ousitano" a pres l'andi abou i ounour de mizoun de Rinaldo Bontempi, eouroparlamentar dal PDS. Apres ele an parlà lou vichepresident de l'"European Bureau for Lesser Used Languages", x y, e l'eouroparlamentar catalan Joan Vallvè aboù en fort descours dedin sa lengo. Aquì es vengù lou moument dal noste Ives Rouqueto, escribaire ousitan de Beziè, que à rezumà l'estorio, i proublemo e les esperansos de nosto pairìo⁽²⁾ ousitano. Apres Fredou Valo à leou prezentà lou film-doucumentari "Valades Ousitanes". Es segouìo la prouiesioun de na bolo de 10 minutos prezo dal film de Diego Anghilante e Fredou Valo, virà espresament en franses. Lou public s'es ben agradà d'aquesto sintezi, e sal fenir de la serado a poungù en paou de questioun a i dui aoutour. Ma dran se soun encà pasà i entervent empourtant de Roberto Vaglio, Asesour a la Mountanho de nosto Rejoun e da sempre engajà per la defezo des minouransos dal Piemount; de Mariano Allocco, President de la Coumunità Mountano Val Mairo, vengù findi isì esprese per countiar de lou proujet "Espaci Occitan" que la sio Coumunità à sabù abou grand couraje menar a boun fin; de Giacou Loumbard, aduech President de la Chambro d'Oc, que à parlà d'aqueste ourganisme ecounomic; e finaloment de Claudia Aburrà, Asesour a la Coulturo de la Val Po, que à pourtà i salut de sa Coumunità Mountano.

Touto la serado es està segouìo da douos "chourmos"⁽³⁾ de la RAI, uno nasiounalo e l'aoutro mandà da lou dinamic diretour de la RAI- VAL D'OUSTO, x Romeo.

'L ero escazi 8 ouros cante lou mounde à pourgù s'arambar a la cuzino des Valados Ousitanos ouferto da la Chambro d'Oc. Lena, Mirka e Fabrizio an servì a tuchi i afamà i toumin dal Mel (val Varacho), lou vin Briquet (val Cluzoun), la tourto de prus de l'oste de Bartolo a Sambuc (val d'Esturo), lou bur dal Besè (val Varacho), l'espesialità de la jalino cuecho abou lou fen, semousto da l'oste de Flipot a La Tour (val Pelis), lou pan dal fourn a bosc de Venascho (val Varacho), la jardiniero de Pizano (val Po), lou saras al fen de la val Pelis. Tetun parèis que abou en veire de vin e la ganaso pieno tuchi an apresià encà de mai la questioun ousitano. Pouter de la tripo!

La serado es fenìo coumo toutos festos ousitanos: aboù les chambos sout lou desc, en veire a la man e nostos chansoun d'amour e de tristeso. Ives Rouqueto, grant amis e coumpanhoun, chantavo abou sa voous belo e founzo les chansoun de l'Ousitanio Grando, e la chourmo des Valados respoundìo aboù "Vien devizà 'boù mi Marieto". Al mes lou brave Cristian x, jouve bretoun que travaio per lou "European Bureau" e que a pa quità tout lou jour, e la nuech, i ousitan.

Se isubiavoun⁽⁴⁾ de dir que eroun dedin uno des mai vieios e counouisùos "brasserie" de Bruxelles, propi sus la "Grand Place", lou cor rinasimental de la vilo, entre chambrìe e taoulà de mounde que nous gachavoun esbuì. I se saren pensà: "d'ente sourton aquesti?".

"Me diaou! Sien i ousitan! Couro i vosti reire viravoun encà patanù din i bosc i nosti reire chantavoun jo la pouezìo pu rafinà. Ma es pa fenìo: aouviarè encà parlar de nous!".

^ (1) affollata, stipata

^ (2) patria (termine coniato dal Poeto Barbo Toni Boudrìe)

^ (3) troupe, squadra

^ (4) dimenticavamo

| Back |