ETNIES

Dal pòrtaparaula de lo laboratòri politic
Paratge vai vèrs l’Euròpa

Dui eveniments an marcat un chambiament concrèt dins l’orizont polític de l’occitanisme.

Lo 20 de julhet, dins un rescòntre a Besièrs, al qual ilhs an partecipat, second lors diferentas qualificacions, de rapresentants de moviments polítics occitans CRÒC, País Nòstre, Partit Occitan, Partit Nacionalista Occitan, Unitat d’òc, Anaram au Patac e Paratge, se siem trobat tuchi d’acòrdi que lo “nacionalisme” qu’avia caracterizat l’occitanisme istòric al es pus actual e que lo chamin da far es aquel de se lïar sempre de mai a las realtats regionalas.

Lo 14 de setembre, País Nòstre e Unitat Catalana, partit catalan, an presentat a Leucata un manifèst programàtic que caracteriza lor activitat abo una clara connotacion regionalista, la mesma qu’es a la basa dal laboratòri polític PARATGE.

Entre lhi moviments occitans e catalans ilh vai nàisser un’alïança estratègica decò dins lo Lengadòc, region qu’es caracterizaa da la dobla identitat occitano-catalana.

Lo “manifèst” de País Nòstre repilha aquest esperit, en disent que:

“Siem un moviment regionalista ont ilhs se tròbon de temperaments diferents. Per nosautri, l’avenir de la re-gion, la salvagàrdia de nòstra identitat e de nòstre patrimòni son l’essencial. Çò qu’es emportant es la vita regionala. Nos decidem al País”.

Second Paratge, ensita, la chal “elaborar un projècte de desvolopament de las valadas occitanas, mirat a permetre la vita sus las montanhas, qu’al aie sa centralitat e son còr dins la persona endeviduala que viu dins las valadas e qu’al pòrte a la realizacion d’un sistèma de las valadas occitanas comprenent sie lhi territòris a auta marginalitat, sie la zòna ai pès de las montanhas, endrech de rescòntre e d’union abo las richas planas de Turin e de Coni”.

Lo procediment de regionalizacion, que presenta de diferentas evolucions dins chasque Estat, nos demanda fòrtament d’èsser encisius dins la gestions de lhi enterès dal territòri.

Nos chal devenir propositius per çò qu’esgarda la projectualitat política. La dràia d’un empenh localament lïat a las realtats de chasque region ilh comença a se traçar clarament, s’explicant dinas un’alïança estratègica qu’embraça las regions que compauson l’Espaci Occitano-Catalan”.

PARATGE es precursor e actor dins aquesta dinàmica, e, après sa presentacion en Catalonha, ilh es pròcha la dubertura d’una seccion dal laboratòri polític en Provença.

Mariano Allocco

OUSITANIO VIVO - Anado XXIX - n° 08- setembre 2002 - N° 270