Val
Mairo
Navisar
ier per esperar deman
Elva es estaa,
ental temp passat, na granda comunitat, articolaa, complèxa e creativa.
Encuei es un país
de montanha, abo lhi estés problèmas qu’an totas las autras comunitats alpinas.
Totun, contínua a èsser diferenta... Se sent dins l’aire lo respir de n’estòria
antica e emportanta.
A Elva esmelha
d’èsser se n’ísola. S’aviert la distança. Se mesura la raidor des montaas. Se
deven part de la maestositat dal païsatge. Esmelha d’èsser sospés dins l’espaci,
n’espaci de belessa irripetibla, austèr e empressionant, careciat dal solelh
e batut da l’aura, truchat da mars de neblas, dai sòns dal silenci, enté virolea
la solitud e lo regret d’un passat difícil, encà avura viu ental recòrd di siei
abitants.
L’idea de n’exposicion
fotogràfica a Elva e lo catàlog naisson da la vuelha de lhi Elvencs Franc Baudino
e Ines Caval-canti de contiar lo passat, l’arconéisser e aluenharse d’aqueste
en maniera justa per poler-lo presentar parelh coma era, e d’aquestas raiç partir
per disenhar un present possible.
Es estat un recuelh
apassionat que Franc Baudino a fach dins lhi ans, un projèct animat da la volontat
de salvar da la nuech de la memòria de documents descolorits dal temp, sença
pus estòria ni testimoniança.
Son de bèlas fotografias
de l’ordinari quotidian mas, en l’estés temp, de n’extraordinària epopèa de
la montanha.
L’exposicion còntia,
a travèrs na galeria de ritrats, un sècol de vita dins Elva: l’existença de
la comunitat marcaa e caracterizaa dai siei moments vitals. E, en ben de cas,
la fotografia nos rend mai aquesti moments de vita passaa.
L’exposicion resta
dubèrta lo mes de lulh e avost. Inauguracion: Diamenja 7 de lulh a 15 oras –
Projeccion multimediala - Récital de Música e Paraulas abo: Lhi Sonaires, Luca
Quaglia
L’iniciativa es
promovua da: Chambra d’òc, Comuna d’Elva, Parrocchia S. Maria Vergine Assunta.
Patrocini de: Region Piemont, Provincia de Coni, C.M. Val Maira, ATL del Cuneese,
Le Terre del Marchesato.
Dario
Anghilante
OUSITANIO VIVO - Anado XXIX - n° 06- junh 2002 - N° 268