Mobilitacion en Provença

Sus lo jornal “Prouvenço Aro” (n. 167 - Mai de 2002), lesem una nòva ben interessanta. En Provença la lhi a una mobilitacion per contrastar lo tentatiu de separatisme per òbra d’irresponsables extremistas que se proponon de destachar la lenga regionala de Provença da l’ensem de la lenga d’òc. “Un pichot group de militant regiounalisto s’es douna pèr souleto toco de secuta li poudé publi despièi d’annado fin de faire marca dins la lei la lengo regiounalo de Prouvenço, emperativemen destacado de l’ensèn de la lengo d’oc”.

Aquesta mobilitacion contra l’extremisme separatista provençal es menat en collaboracion da organismes provençalistas e occitanistas, a demonstracion qu’es possible de trabalhar en union se la lhi a la vuelha de bastir e pas de destruire.

“Lo Mouvamen Parlaren, Lou Felibrige e lou CREO (Centre Regional d’Estudis Occitan) Provença, associacioun que recampe la maje part di mouvemen culturau de la regioun, fan siéuno, d’un biais escrupulous, la pousicioun de Frederi Mistral qu’a mant-un-cop crida l’unita de la lengo d’oc, dins sa diversita emé si dialèite difèrènt que soun lou prouvènçau, lou languedoucian, lou gascoun, l’aquitan, lou limousin, l’auvergnas, lou dóufinen (cf. lou Tresor dóu Felibrige de F. Mistral, intrado “dialèito”)”.

L’accion es de mai en mai sostengua: 110 deliberacions de Conselhs municipals de la Provença, d’eligits, d’escrivans, d’artistas e de responsables que aderisson a la mobilitacion.

Per çò que nos regarda, dins las valadas avem malurosament una representança d’aquel grop separatista, extremista e integralista que refusa l’unitat de la lenga d’òc. En çò nòstre aquò se passa en Coumboscuro de la Val Grana e, derrierament, per vòutz d’una organisacion que se demanda “Consulta provenzale”, que  representa vira-virat la mesma gent. Es trist de veire una tala evolucion/involucion des idèas e des causas.

Da. A.

OUSITANIO VIVO - Anado XXIX - n° 06- junh 2002 - N° 268