ETNIES
Tròbo que fai onta que...
L’antisemitisme
Tròbo que fai onta qu’en Itàlia se face una procession de
gent embarboiraa da kamikaze que brama insults injuriós a Israèl, lèva de fotografias
de dirigents israelians abo una crotz nasista en frònt, assussa (1) lo pòple
a odiar lhi ebrèus [...]
Tròbo que fai onta que la Glèisa Catòlica done libertat
a un siu evesque qu’alòtja en Vatican, e que a Jerusalem avia un arsenal d’armas
e bombas colinaas (2) dins sa sacra Mercedes, de partecipar an aquela procession
e de parlar al micròfon per rengraciar a nom de Diu lhi kamikaze que massacron
lhi ebrèus dins lhi restaurants e supermarchats.
Tròbo que fai onta qu’en França, aquela de la Liberté-Egalité-Fraternité,
se bruson las sinagògas, se terrorizon lhi ebrèus, s’enfraunhon (3) lors cementieris.
Tròbo que fai onta qu’en
Olanda, Alemanha, Danemarca lhi joves se gabon de portar lo kaffiah coma lhi
avantguardistas de Mussolini auçavon lo baston e lhi símbols fascistas. Tròbo que fai onta que dins un baron d’Universitats d’Europa
lhi estudiants palestinians la façon da padrons en assussant a l’antisemitisme.
Qu’en Suècia aion demandat de retirar lo Prèmi Nobèl per la Patz donat a Shimon
Peres ental 1994 per lo laissar just a Arafat, aquela colomba abo la ramoliva
en gola, e tròbo que fai onta que lo Comitat d’aquel premi pense de far pròpi
parelh. A l’unfèrn lo Prèmi
Nobèl e onor an aquel que lo recep ren.
Tròbo que fai onta
qu’en Itàlia las televisions de l’Estat soflon sus l’antisemitisme en plorant
masque lhi mòrts palestinians e fan la tara ai mòrts israelians; fan lhi onors,
per la presencia dins lors transmissions, ai filibustiers que ier eron ben jaiós
de l’atentat de New York e encuei son jaiós de lhi atentats de Jerusalem, Haifa,
Netanya, Tel Aviv. Tròbo que fai onta que lhi jornals façon lo mesme e que monton
sal caval gris perque a Betlem lhi cars israelians encerclon la Glèisa de la
Naissença, e fan pas lo mesme perque dins aquela glèisa dui cents terroristas
palestinians ben armats (abo de caps de Hamas e Al-Aqsa) son ospitats dai fraires
[...]. Tròbo que fai onta qu’en donant lo numre de lhi israelians mòrts dins
aquesta Seconda Intifada (quatre cent dotze), un famós quotidian a remarcat
que la n’a ben de mai que mueron dins lhi incidents de la via (sies cents a
l’an).
Tròbo que fai onta
que l’Osservatore Romano, lo jornal dal Papa qu’a laissat al Mur dal Plor una
letra d’excusas per lhi ebrèus, face d’acusas d’extermini a un pòple qu’es estat
exterminat a milions dai cristians. Da lhi europèus. Tròbo que fai onta qu’ai
sobreviscuts d’aquel pòple, qu’an encara la marca a fuec sal braç, aquel jornal
refuse lo drech de se revoltar, de se defénder, de se rebelar a un nòu extermini.
Tròbo que fai onta qu’en nom de Jesucrist (un ebrèu que sensa aquel sarion encuei
tuchi desocupats), lhi prèires, lhi Centres Socials o d’autres, amorasseon abo
lhi assassins que fan sautar en aire qui a Jerusalem vai a minjar na pizza o
achatar lhi uòus. Tròbo que fai onta que iston dal cant d’aquilhi qu’an tacat
la sason dal terrorisme sus lhi avions, dins lhi aeropòrts, a lhi Juecs Olímpics
[...]
Tròbo que fai onta
qu’esquasi tota la manchina [...] eissublie lo contribut donat da lhi ebrèus
a la batalha antifascista: Carlo e Nello Rosselli, Leone Ginzburg, Umberto Terracini,
Leo Valiani, Emilio Sereni; las fremas coma ma amisa Anna Maria Enriques Agnoletti
fusilhaa a Florença lo 12 de junh del 1944; e setanta cinc sus tres cents e
trenta cinc amaçats a las Fosse Ardeatine e aquilhi tuats sot tortura o en combatiment
o denant lo ploton d’execucion. [...] Tròbo que fai onta que decò per colpa
de la manchina (pensem an aquela qu’envida e pica las mans a lo rapresentat
de l’OLP que vòl la destruccion d’Israèl) lhi ebrèus en Europa sion mai pilhats
da la paor e an lhi frisons al passatge de lazarons abilhats da kamikaze, coma
tremolavon a Berlin la Nuech di Cristals quora Hitler enchaminava la Chaça a
l’Ebrèu.
Tròbo que fai onta
qu’en nom de la paraula Patz, oramai esputanaa mai des paraulas Amor e Umanitat,
lhi oportunistas assòlvon d’un cant solet l’òdi e la bestialitat.[...]
Tròbo que fai onta
qu’un baron d’italians e europeus ciernon coma bandiera lo senhor (se fai per
dir) Arafat. Aquel òme da gaire que, mercés ai sòuds de la Familha Reala Saudita,
fai lo Mussolini e se gaba de passar coma lo salvador de la Palestina. [...]
Aquel fals guerrier, sempre en costum de soldat coma Pinochet, qu’a mai partecipat
a una batalha e la guèrra la fai far ai paures diaols. Aquel boriós qu’a fach
falir lo negociat de Camp David e la mediacion de Clinton [...]. Aquel busiard
en cana qu’es masque sencer quora (en privat) nega lo drech d’exíster a Israèl
e que nega aquò qu’a just dich. Fai sempre lo doble juec e t’engana fins se
lhi demandes l’ora. Da el fenisses sempre colhonat. Un etèrn terrorista (que
ista al segur) que a adestrat decò lhi terroristas de la Baader-Meinhof e decò
de mainaas de dètz ans. Pauras mainaas. Encuei
la n’a cent en chantier per ne’n far de kamikaze. Aquel que la frema la ten
a París e son pòple lo ten dins la mèrda e lo gava d’aquí masque per lo mandar
a murir e a maçar, coma las pauras filhas que per se ganhar lo respèct de lhi
òmes se devon far sautar en aire e tuar d’innocents.
E totun ben d’italians
l’aimon coma aimavon Mussolini: es tanben per ben d’europèus.
Tròbo que fai onta,
e veo en tot aquò un novèl fascisme, un novèl nazisme qu’es mai vergonhós perque
menat d’aquilhi que fan lhi bonistas, lhi progressistas, lhi comunistas, lhi
pacifistas, lhi catòlics o mielh lhi cristians, e qu’an lo morre guèrs de sonar
bellicistas aquilhi coma iu que bramon la veritat. Iu lo veo e lo dio.
Iu abo lo tràgic
e shakespaerian Sharon siu jamai estaa còtia. [...] Abo lhi israelians me siu
desputaa dur mai qu’un bòt e, ental passat, ai ben defendut lhi palestinians,
benleu de mai d’aquò que meriton.
Però isto abo Israèl, isto abo lhi ebrèus e defendo lor drech a exíster, a se defénder, a ren se far exterminar un autre viatge. E desgustaa da l’antisemitisme d’un baron d’italians e d’europèus, ai onta d’aquela onta que desonora mon País e l’Europa. [...]
Oriana Fallaci
(trad. de Dario
Anghilante, da lo setmanal “Panorama” de lo 13/4)
(1)
aizza
OUSITANIO VIVO - Anado XXIX - n° 04- april 2002 - N° 266