PER LA RECONEISSENÇA DEL BILINGÜISME
Amassada de prima de l' I.E.O.

Dins l'Amassada Generala del 28 e 29 d'avril passaa a Vilanòva d'Olt, l'Institut d'Estudis Occitans, organisme que reunís mai que 30 seccions departimentalas sus l'ensemp de las regions occitanas, a votat doas importantas mocions sus las lengas occitàna e còrsa.

Las reportem aicì dins la version difondia da la Secretaria Generala de l'Institut Mirelha Braç.

Mocion 1

L'Institut d'Estudis Occitans aculhís amb satisfaccion la publicacion pel Ministre de l'Educacion de mesuras a favor de las lengas de França, dichas "regionalas".

Demèst las mesuras anonciadas, l'Institut d'Estudis Occitans presa:

• la reconeissença del bilingüisme coma "vector privilegiat" de l'ensenha-ment de la nòstra lenga
• la creacion d'un concors especific pel recrutament dels professors d'escòla qu'auràn d'ensenhar en occitan
• la proposicion faita pel Ministre als Conselhs regionals de negociar amb l'Estat convencions especificas per tal de desvolopar l'ensenhament de la nòstra lenga e, en particulièr, lo bilingüisme
• la reconeissença del trabalh realizat per las escòlas associativas que causiguèron d'ensenhar per immersion lingüistica e, per çò que tòca a l'occitan, las Calandretas.
• L'Institut d'Estudis Occitans contunha de demandar la ratificacion de la Carta europèa de las lengas regionalas o minoritàrias. L'Institut d'Estudis Occitans prepausa dempuèi d'annadas la modificacion de l'article 2 de la Constitucion per tal de balhar a las lengas de França, dichas "regionalas", una reconeissença constitucionala.

Mocion 2

L'Institut d'Estudis Occitans sosten sens cap de resèrva la reivindicacion a favor de l'ensenhament de la lenga còrsa. L'Institut d'Estudis Occitans considèra que la demanda d'un ensenhament generalizat de la lenga còrsa es legitima. Es una reivindicacion normala e, se l'òm vòl que visca la lenga còrsa, s'agís pas que d'un mimimom. L'Institut d'Estudis Occitans desira que la volontat dels elegits còrses siaga presa en compte pels deputats e senators e que la discutida siaga pas parasitada per d'unas declaracions que vòlon far creire que l'ensenhament generalizat del còrse en Corsèga seriá un dangièr per la Republica. Desiram que los deputats e senators de las regions occitanas, quina que siaga sa color politica, vòten a favor de l'ensenhament del còrse del biais lo mai generós que siaga. Los apelam puèi a prepausar per l'occitan una lei identica. L'occitan es la lenga primièra de las lengas de França, dichas "regionalas".

Rosella Pellerino

OUSITANIO VIVO - Anado XXVIII - n° 5 - mai 2001 - N° 256