VAL MAIRO

JOVES D’ÒC: vacança e mùsica

Entre lo 9 e lo 23 dal mes de julhet lhi joves d’Occitània an agut per lo tèrç viatge l’ocasion de partecipar a l’Eschambi Internacional Occitan organizat da la Comunitat de Montanha Val Maira abo lo concors de l’I.E.O. Animacion: de fach, decò aqueste an son estats vint e quatre lhi italians e lhi francés qu’an fach part dal grop de la Colònia d’òc. Lh’efants e las filhas, ente lhi 13 e lhi 18 ans, an passat quinze jorns en partatjant pas sonque la lenga, mas decò la cultura di país que lhi an auberjats: lo Verdon e la Val Maira. Dins las meravilhosas gòrjas e sus lo Lac de Sainte Croix i a agut espaci per se repausar, per praticar la vela, per s'espassetjar e visitar lhi vilatges provençals, mas decò per aprèner las danças e lhi chants tradicionals, ben coneissuts per lhi joves italians mas sovent una vera rivelacion per aqueli de l’autre costat. La Val Maira, après, lhi a aculhits abo las sias montanhas, lhi cavals de Merens, las glèisas frescaas, lhi Ciciu dal Vilar, e sobretot abo la sia gent que, causa estonanta per lo monde de l’Occitània Granda, es encara ben acostumaa a parlar a nòstra mòda. Fin finala, doas setmanas plenas d’experienças e d’ocasions de creissènça umana e culturala qu’esperem pòsque contunhar dins lhi ans a venir.

Per lhi joves italians l’estiu dins las valadas a prepausat decò un’autra interessanta activitat, lo second estagi "Pensar la mùsica e la dança dins las valadas occitanas", passat a la fin d’avost a Praavielha. Aqueste cors, qu’avia l'objectiu de formar joves animators dal territòri dins lo champ musical, a vist la partecipacion d’una vintena d’iscrichs. Abo la guida de Renat Juriè, espèrt de chant popular, e Yves Rousguisto, titolar de la Catedra d’Insenhament Artistic e Cap dal Despartiment d’Etnomusicologia de Niça, lhi joves an jogat abo lhi sòns, a la descuberta d’una maniera originala de prepausar la mùsica occitana encuei. Las sessions de trabalh an donat l’ocasion pas sonque d’aprèner a realizar un instrument o a organizar juècs musicals, mas de poler se confrontar sus experienças, problemas e sumis de qui vòl far de la mùsica e de la dança un instrument per far arribar en un biais empatic e simple tota la cultura occitana.

Rosella Pellerino

OUSITANIO VIVO - Anado XXVII - n° 8 - 21 de setembre 2000 - N° 248