Pichot de Toulouzo; Benvenguts dins les valades!

La semano dei 14 e 20 de mai sarè da navizar per i 21 pichot, da i 8 e i 12 ann, e i lour tre magistre de l'escolo Calandreto St. Cubran de Toulouzo què son està en val Varacho per en besounaje abou i escoulier d'es elementares de Sampeyre, Chasteldeifin e lou Mel. I pichot de l'Ousitanio Grando on troubà n'acuienso chaoudo: i soun està ouspità da les famihes e i on vezità i cantoun pu joli e les atività pu enteresontes, siò de la valado que de les viles de Saluses, La Manto e i soun anà finde a Turin.

Ma la sarè na semano da navizar decò per i escolulier de la Valado: aquìe de lour que parloun l'ousitan on poulgù devizar abou i pichot de Toulouzo dins la memo lengo, aquìe que, ensinto, lou parloun pa ma estudioun lou franses a l'escolo on poulgù verifiar lour couneisenso de la lengo. La sensasioun pu jolio es està que i meinà de la valado on pa sentù i pichot de Toulouzo coumo d'estrangier, carcaren i liavo, carcaren que i faziò sentir pu vezin que de coumpanh vengù da la piano. E i pichot de l'Ousitanio Grando, acoustumà a parlar l'ousitan (abou l'italion e lou tedesc) da conte i avion 3-4 ann, se soun pa jomes sentù speizà, soun està alegre coumo a lour meizoun.

I liam tra i dui coustat de l'Ousitanio dins i drier temp on repres fouorso. E bloou pa jomes coumo auro i eschombi se fon per piazer, per vueio de descubrir d'aspet pa couneisù, papus abou la grinour de i emigront, e nhonco abou la superfisialità di grup de "folklore". N'aire noou atraverso touto l'Ousitanio, da les Valades d'Italio a la Val d'Aran, e i ousitan on na gron vueio de se counouiser.

Giovanni Antonio Richard

OUSITANIO VIVO - Anado XXVII - n° 5 - mai 2000 - N° 245