VAL VARACHO

Besounage tra dui cantoun de l’Ousitanio
22 escoulier de Toulouzo a Sampeyre dei 14 ei 20 de mai

Tres magistre e 22 meinà de l'escolo St.Coubran de Toulouzo, d'age tra i 9 e i 11 ann, venaren en Val Varacho da diamenjo 14 a sonde 20 de mai, ouspità da de famìes de Sampeyre, Roure e Fraise. ‘L ei na claso ourganizà sus lou moudel de les Calandretes, que ‘studio decò l'ousiton e l'italion. Da dòoutres mes ‘l ei tout en suseguir de countacte ufisial tra les escoles e aboù l'ambasiato de Fronso a Roumo, e de prezentasioun tra escoulier aboù 'n eschombi de letres e dezenh.

L'escolo St.Cubran de Toulouzo es enteresà a counouiser na valado d'Italio que àise sa memo rèis lenguistico, l'ousitano, e i escoulier de les elementares de Sampeyre, Chasteldeifin e lou Mel poularen viòoure la jolio esperienso de devizar abou d'aoutre meinà en utilizont de lengues emprezes a meizoun ou estudià a l'escolo.

Lou prougramo d' acuienso, fach aboù la coulabourasioun de l'Ufisi per lou Turisme de la Cumunità de Mountahno, prevei de sourties ensemou e de vizìtes per la couneisenso d' i aspet pu particulier e carateristic de la Val Varacho e de la zono de Saluses, e blòu finde en viage a Turin.

A la fin de la semano de besounage tra ousiton d' i dui coustà d'es Alpes es previsto na festo a Roure, abou la partesipasioun d'es famies ouspitontes, entè l'òourè n'escadreto de meinà de la valado que fazarè en counsert de mùzico ousitano aboù i estrumen tradisiounal.

L'ouspitalità a i meinà de l'aoutre cont de l'Ousitanio sarè rechambià l'on que ven, conte carque claso de la valado poularè anar pasar na semano a Toulouzo.

I rapouort enteisù tra l'escolo de la Val Varacho e l'Ousitanio fransezo, per merit sourtout dei travai apasiounà dei diretour didatic de Venasco, dr.Piero Bottiroli, se manifestoun en seicontou manieres: jo dei 10 ei 13 d'abril n'escadreto de magistres d'escolo elementaro e materno on fach lour bateme din l'Ousitanio fransezo e soun anà finde a la luenho Béziers, din la Regioun de Languedoc-Rousillon, per partesipar a 'n Stage de lengo ousitano ourganizà dei Sentre "Aprene".

Giovanni Antonio Richard

OUSITANIO VIVO - Anado XXVII - n° 4 - abril 2000 - N° 244