lo, 19/03/2000
Associats, Collaboradors dal jornal, Amisas, Amis
SANDE 01 d’abril 2000
a DRAUNIER - DRONERO /Val Maira - Auberge Restaurant CAVAL BLANC
OUSITANIO VIVO se retròba per la sia Amassada annuala
Lo 1999 es estat per las Valadas Occitanas un ann istòric e excepcional:
• Es istaa aprovaa la lei sus las minoranças lenguisticas istòricas en Itàlia, e lh’occitans i son dedins. Lo siu festejament dins nòstras valadas es estat fòrt: lo grand rescontre de gent e d’autoritats per la descutia e la granda festa de Rocavion lo 26 de febrier lo demòstron. Es un gròs resultat mas l’empenh mai grand es aüra per l’aplicacion de la lei. Nosautri, que l’avem abo fòrça sostengua, chal que siem en premiera linha per la defender e far en maniera que done de resultats.
• S’es formalisaa l’Associacion Espaci Occitan, lo siege de Draunier es en preparacion, d’iniciativas son já en chamin e d’autras esperem que sion fito lançaas. Ensoma avem confiança que las administracions publicas façon la lor part dins l’accion occitanista.
• De nòstri associats trabalhon fòrça dins las administracions publicas o en collaboracion per far avançar la cosciéncia e las realizacions occitanistas.
• D’administracions publicas de l’Occitania Est intron dins la "Associacion des conses e elegits occitans", aquò es un fòrt liam abo l’Occitània d’ailai.
Un trabalh emportant es estat realizat directament da Ousitanio Vivo:
• Lo jornal mesadier marcha ben, abo regularitat e abo un bòn numre de colaboradors e sobretot de lesaires
• La comemoracion per F.Fontan "E i a lo solelh" - Fraisse 16/10/99 - s’es ben passaa: programa, organizacion, collaboracions.
• Ousitanio Vivo Film contunha son trabalh: realizat dins lo ‘99 lo documentari "F. Fontan e la descuberta de l’Occitània" a en chantier d’autras iniciativas.
• Lhi rapòrts abo l’Occitània granda e la Val d’Aran se son afortits (Ousitanio Vivo es aüra seccion departimentala de l’IEO e un nòstre rapresentant es ental Conselh de direccion).
• Lhi rapòrts enternacionals (Confemili, Minoranças en Itàlia, ALE, ecc.) son estats mielh seguits
• Avem partecipat a las Elecions Europeas dal 13/06/99 abo lh’autonomistas valdostans.
• Son estaas realizaas las edicions:
- G. Agresti "Il segno del desiderio - introduzione alla letteratura occitana
contemporanea";
- Lhi Sonaires - CD-MC "Ai fach un sumi";
- Gai Saber - CD "Esprit de Frontiera" (coedicion)
- Di.Anghilante-F.Valla - Video caisseta VHS "E i a lo solelh" (it. e fr.)
- "Aicí Occitània" - Catalòg de la Creacion Occitana (partecipacion)
• La destribucion dal material es estaa facha e la vendita militanta tanben (ma menc qu’ental passat).
• Siem aderent a La Chambra d’Òc
• Per fenir, l’Associacion marcha econòmicament ben.
Abo tot aquò ren tot es anat per lo mielh:
• I a encara un sens de barrament vers çò que se passa al defòra de Ousitanio Vivo, sus lo territòri, sobretot vers de novèls sectors e actors d’activisme occitanista.
• Pas pro de reflexion sus lhi chambiaments, pas pro de recercha de collaboracion abo las aministracions e lhi grops que trabalhon dins nòstra mesma dralha
• Las edicions demandarion un esfòrç mai gròs (libres, musica, bricolaria occitana, ecc.)
• Lo mai d’entrada es tojorn arribaa da lhi banquets que son pas pro nombros
• D’iniciativas son prestas en chantier e pura bòujon pas, d’autras se polarion lançar se i foguesse mai de decision e de gent.
Segurament aquò demanda un’estructura organizativa melhora se volem pas que Ousitanio Vivo reste (coma arriba a d’autri) a la fenestra a gachar çò que se passa. Subretot chal esser degordits perquè las causas van fito e demandon de responsas e solucions en temps corts.
Per aquò:
- Chal fixar ben lh’objectius que veiem necessari per las Valadas, sobretot en ralacion a la Lei estatala 482-15/12/99. Sus aquesti objectius tuchi devon esser ben d’acòrdi e lhi sostenir.
- Chal pilhar de decisions claras e sobretot traçar un programa de realizacions pricis.
- Aver de responsable de chasque sector de realizacion, lhi donar plena confiança, sostenh e autonomia de trabalh.
- Anar vers una modernizacion e foncionalitat d’organisacion (vist decò lhi novèls estruments de comunicacion e la situacion geogràfica des Valadas).
A ma maniera de veire, lo nòstre chal que sie un encòntre de confront per de monde qu’a vuelha de s’engatjar a trabalhar per l’avenidor mai qu’una audicion de relacions. Es per aquò qu’ai traçat aqui de sobre aquel pichòt conterendut.
PROGRAMA
• 3 oras - Descussion e confront
• 7,00 - Tesserament a l’Associacion per l’ann 2000
• 7,30 - (per lhi tesserats) Actribucion de responsabilitat
• 8,30 - Sopada tuchi ensem (a un pretz pas char).
• 10,00 - Proieccion d’un enteressant documentari RAI de lh’ans ‘70 sus la novèla cosciéncia occitana dins las Valadas.
Per aquilhi que penson de partecipar a la sopada saria ben de lo comunicar:
Siege Venascha: Tel-Fax: 0175-567606
Dario e Ines: Tel-Fax: 0171-918971 - E-mail: dario.anghilante@afpdronero.it
Diego: Tel-Fax: 0175-977890 - 0335-6020454 - Tonin: Tel. 0175-87165
OUSITANIO VIVO - Anado XXVII - n° 3 - mars 2000 - N° 243