Val Cluzoun
LA MORT ES ARIBÀ DA SOUBBRE
La pi groso deigrasio ën mountanho quë notra valadda abbiën counouisù s'es pasâ lou 26 dësembre 1999 ën val Argentièro, aouto val dë Suzo. Trei jouve dëi Peirouzo, Andrea e Sandro Pansolin e Manuel Daviero e un de Bibiano, Andrea Buffa, lh'ei an troubà la mort. Li trei peirouzin da ën caire e Andrea Buffa oou soun amis Alberto Edargi da l'aoutre, erën parti për escalada lou couloou dë glas da Rio Gentira e s'eren fatalment troubà ën la vaoudio soubbre la Bruzà dà Plan dount i l'avien laissà la macchino. La valaddo dë Cesano ero sënso neou co matin e la mountanha erën desoulà e soumbra, moc soubbre di 2000 la blancho baravo lâ cota. "Paouro notro mountanho" pensavou, quant subit aprèè marëndo pasavou su da col dë Seitriero per ana sërcha ën poc dë neou ën Savoio. Rlen pouio fâ pensa quë uno chalancho ou meme un cit eicaias pouguese parti. Notri amis aviën proubablament meme pas pougù s'avisa quë l'aouro chaoudo coumensavo a soufla su la simmo de la mountanho, da moument que la matin vitte en Peirouzo tout ero tranquile e quë su da col la nëvruchavo. Tantutun, couro li jouve ërmountaven lou coumbal për s'approucha a la cascaddo dë glas, uno chalancho es sourtio da la nebbia, quë ënvërtoulhavën la part aouto dë la mountanho, e a soutrà tuti sout a sa cuberto jalà. Moc Alberto, quë es resta ou la teto foro es aribàa survioure. Per lh'aoutri, ni lour amis, la guiddo alpino Andrea Sorbino, quë ero parti për prëmier a li sercha, ni lou soucouërs alpin, aribà subit apree, an pougù li tira foro viou.
"I l'eren sout a mënc d'ën mettre dë neou mollo e pësando, proubablament dë selh abarounà su l'aout da l'aouro e parti quant la tëmpëraturo s'es aousa" sërcho dë spiega Luigi Barus, un di soucouritour quë an deisoutrà qui paoure jouve. Per toutto la valaddo e për tuti quelli quë li counousiën l'es ità uno groso tragedio. Quattre jouve pien dë vitto nous an laisà, ou lour entusiasme e volho de vioure, ou lour pasioun per la mountanho que a la fin së lhi es pilhà. Oub lour quarcozo de nousaoutri es co mort, la countinuasioun de la vitto a quittà per en moument:
Andrea Pansolin ero da poc intra en l'squaddro da soucouërs alpin de la Val Germanasco, da dui an a l'atendio quë së librese uno plaso, aviou a peno pourtà si papier a Turin, un de si soim s'ero realizà.
Andrea Buffa ero da soucouërs dë la val Pellice, e ero deco ità voulountari da soucouërs dë la pita dë Pral a rëndre servisi a tuti quelli quë aviën d'incidënt ou li ski.
Sandro Pansolin e Manuel Daviero erën las anima jouva da CAI, ski bisiclëtto, mountanho, i fesien tout ben e oub entusiasme, oiro i soun mort.
Lour souvenir e lour sourire però rëstëren ëncaro ënsëmp a nou.
William Pons
OUSITANIO VIVO - Anado XXVI - n° 1 - genier 2000 - N° 241